मनोरञ्जन…

तितो सत्यले गरायो तितै अनुभव (+Photo)

July 4th, 2008 Edit

निर्मल श्रेष्ठ, हङकङ / एचकेनेपाल डट कम -
‘एक काज, दुई पन्त’ को शैलीलाई पछ्याउदै फेब्रुवरी महिनामा कार्यक्रम प्रस्तुत गर्न हङकङ आइपुगेका चर्चित जोडी दिपकराज गिरी र दिपाश्री निरौलाले केही स्थानीय कलाकारहरुको सहभागितामा जोर्डन, युन लोङ, स्टार फेरीलगायतका स्थानहरुमा धारावाहिक ‘तितो सत्य’ का लागि भनी दृष्यहरु समेत छांयाकन गरेका थिए।

दिपकराज गिरी र दिपाश्री निरौला, फाइल तस्वीरः जगत अम्बु गुरुङ / एचकेनेपाल डट कम।

केही हप्ताभित्रै प्रसारण हुने आश्वासन दिई जोडी नेपालतर्फ उडेको पनि चार महिना वितिसक्यो तर तितो सत्यमा सो दृष्यहरु त कता हो कता हङकङको नाम समेत एकपटक पनि उच्चारण भएको नसुन्दा स्थानीय कलाकारहरुबाट ‘तितो सत्य’ ले आफूहरुलाई तितै अनुभव गराएको स्वरहरु गुञ्जन थालेका छन्। जोर्डनमा अवस्थित एक ब्यूटी पार्लरमा दिपक र दिपाले करीव पाँच घण्टा विताई कपाल कटिङ, कलर, हाईलाईट, ट्रिटमेन्ट लगायतका सुविधाहरु सित्तैमा लिई छायाँकन समेत गरेका थिए। आफ्नो पार्लरको दृष्य र अनुहार आउने आशामा दिपकलाई सिगार्न घण्टौ खर्चेकी अर्चना सो दृष्य हेर्न नपाएकोमा खिन्न छिन्।

हङकङमा छायांकनका लागि व्यवस्था मिलाएका पूर्णले पटक-पटक दिपाश्रीसंग सम्पर्क गर्दा अब केही दिनमै प्रसारण हुने आश्वासन मात्र पाएको बताउछन्। सत्य के हो त, भनी जान्न ‘तितो सत्य’ का दिपकराज गिरीसंग हङकङबाट मोबाइल सम्पर्क गर्ने क्रममा उनले हङकङमा दृष्यहरु छांयाकन गरिएको कुरालाई स्वीकार्दे भने, ‘त्यहाँ छायांकन गरिएको दृष्यहरु किड्नी चोर्ने डाक्टरसंग सम्बन्धित थियो तर म नेपाल फर्किनासाथ यहाँको राजनीतिक माहोलले अर्के गति लियो, वर्तमान माहौलसंग कथाबस्तु मिल्न नसकेकोले खिचिएका दृष्यहरु देखाउन नसकिएको हो । हामी मिल्ने कथाबस्तु तयार गर्देछौं । ब्यूटी पार्लरको नामसहित दृष्यहरु प्रसारण गर्ने बहानामा सित्तैमा सुविधाहरु लिनु भयो रे नि ? भन्ने प्रश्नमा, ‘हामीले नलिनुस भनेका होइनौ, उहाँहरुले लिनुभएन, कुनै कलाकारहरुसंग हामीले पैसा लेनदेन गरेका छैनौ, समयमा प्रसारण गर्न मात्र नसकेका हौ, यही भदौ महिनाभित्रै पक्का प्रसारण गर्नेछौ।

यही कार्यक्रमका लागि दिपकराज गिरी र दिपाश्री निरौला हङकङ आएका थिए तल हेर्नुहोस् भिडीयो। यस भिडीयोमा अन्य नेपाली कलाकारहरु पप गायक सविन राई, इण्डियन आईडल - तेस्रो प्रशान्त तामाङ र हास्यकलाकार मुन्द्रेका प्रस्तुतीहरु पनि समेटिएका छन्।

कार्यक्रमअघि एचकेनेपाल डट कमले लिएको भिडीयो अन्तर्वार्ता तल हेर्नुहोस्।

Popularity: 4%

Entry Filed under: एचकेनेपाल डट कम